April 2018

Vetlavatnet / Litlastøl

Fin rundtur opp Tveitovegen inn til Vetlavatnet, så opp Vindalsvegen fram til snøgrensa rett før Litlastøl. Hadde ikkje forventa å kunne sykle så langt til fjells på tørre vegar i kveld, men sola har smelta vekk det meste som er av is og snø.

Horndalsnuten(1461m) frå Skiple/Raundalen

Optimalt vær og drømmeføre i dag! Fantastisk flott nedkøyring frå toppryggen (1300m) ned mot Horndalsbotn. 5 cm fersk nysnø øvst og raskt slushføre lenger nede.

Vatnaset-Kaldafjellet/Kaldanuten(1411m)

Flott tur frå Vatnaset til Kaldanuten(1411m). OK nysnøføre øvst, men tung og våt snø ned mot Vatnasetvatnet.

Liaset-Strutseggi

Kveldstur til Strutseggi(1137m). Starta frå parkeringa i sludd og plussgrader.. og etter ein halvtime vart det tidenes klabbeføre då det plutselig klarna opp og temperaturen sank. Skiene vart fullstendig dekt av snø både oppå og under.
Det positive med denne brå temperaturendringa var at det førte til tørr nysnø dei fyrste 400 høgdemetrene ned mot Olastøl og raskt slushføre vidare ned til parkeringa -så då var det absolutt verdt å dra med seg dei ekstra kiloene snø opp til toppen i kveld.

Espelandsdalen - "Åsen rundt"

Sykkeltur over Espelandsdalen til Ulvik og rundt Åsen på kjerreveg/grusveg. Tok ein avstikker over Fletena på turen bort og tilbake

Stokksel-Ingebjørgfjellet | Strutseggi

Formiddagstur til Ingebjørgfjellet(1210m). To nedkøyringar i perfekt slushføre!

LIASET-STRUTSEGGI:
Sidan vær og føre var så bra i dag vart fristelsen litt for stor; svippa oppom Espelandsdalen på veg tilbake, og dermed vart det ein rask tur til Strutseggi rett før det skya til.

Liaset-Strutseggi

Liaset-Strutseggi(1129m). Eit par cm nysnø øvst. Nedkøyring i våt og tung snø.

Hamre-Oksen(1241m)-Oksebrekkene

Ettermiddagstur frå Hamre til Oksen via Seljenuten. Tre nedkøyringar frå toppen ned vestflanken/Oksebrekkene i flott slushføre, kun sugeføre nederst der det flatar ut. Retur til Hamre, ned til absolutt siste snøflekk som var å oppdrive.
Nedkøyringa mot Hamre er minst like flott som Oksebrekkene, og sidan den siste delen ligg nordvendt kunne eg stå på ski heilt ned til 450moh. Varmt og shortsvær opp lia, men måtte på med både dunjakke og langbukse på toppen. Den kjølige vinden senka den effektive temperaturen veldig heilt øvst i dag.

Osa-Viermyr

Sykkeltur langs Osafjorden og opp Osafjellsvegen til Viermyr(730m)

Stokksel-Midtfjell (1255 m)

Vårskitur på sitt beste; lange gode pausar, fjordutsikt, shortsvær, råtten snø og sugeføre deluxe frå topp til botn!
Video: Jo Bjørnar Hausnes

Oksen(1241m.)

Tre nedkøyringar ned Oksebrekkene i flott slush. Varmt og litt tyngre føre på den siste turen; i det vinden løya, disen forsvant og sola stod rett på brekkene.
Var ekstra ivrig med å komme meg på tur i dag(før det vart sugeføre), dermed låg både mobil og fotokamera attgløymd i bilen..

Stokksel-Ingebjørgfjellet-Midtfjell(Disk)

Rute: Stokksel-Ingebjørgfjellet(1210m)-Dalsete-Disk(1180m).
Nydeleg dag, men som i går kveld blas det noko voldsomt i fjellet. Oppe på Disk (fortoppen til Midtfjell) var det til tider vanskeleg å halde seg på beina i dei verste kasta -så me snudde her. Midtfjell er ikkje akkurat staden ein vil være når det bles for fullt. Hardt skareføre heilt øvst men herlig føre lenger nede, spesielt ned frå Midtfjell der sola stod rett på.

Tjoflot-Oksen

Kveldstur til Oksen(1241m). Kraftig vind i lia opp mot toppen. Likevel bra slushføre i midtre del av oksebrekkene, der sola hadde tatt mest.

Liaset-Strutseggi

Liaset-Strutseggi(1137m). Nedkøyring i flott grovkorna slushføre i kveldssola.

Stokksel-Ingebjørgfjellet

Ingebjørgfjellet(1210m). På veg opp mot toppen 3-400 meter aust for meg kom det til syne 8 reinsdyr. Fyrst kom dei litt nysgjerrig imot meg før dei la iveg eit stykke lenger ned i dalen. Ei flott og litt uventa oppleving, og heldigvis var telelinsa med i sekken i dag!

Stokksel-Ingebjørgfjellet

Ny ettermiddagstur til Ingebjørgfjellet(1210m) og bedre vær og føre enn venta. Nysnøen og mildværet dei siste dagane har jamna ut skavlane slik at det var ekstra flott å sette utfor fyrste nedkøyringa frå toppen. Litt tyngre føre i skogen.. men ikkje verre enn at det gjekk greit å få fin flyt. Nyglida ski rett før nedkøyringa gjorde susen i dag!

Stokksel-Ingebjørgfjellet

Ingebjørgfjellet (1210m). I dag kom sola som meldt omtrent i det minuttet eg kom på toppen og ga eit vakkert ljos gjennom det tynne skylaget. Stort sett jamnt fint nysnøføre frå toppen og ned. Ein rypeflokk på 7 stk dukka opp rett før siste stigning.

Stokksel-Nonfjell-Verkadalsnuten

Flott føre med 15cm tørr nysnø opp lia mot Nonfjell. Som venta litt meir avblåst vidare oppover. Nedatt forbi Nonfjellshytta og den bratte åpne lia mot Stokksel -artig skogskøyring når forholda er så bra som i dag.

Liaset-Strutseggi

Vått, regnfullt og klabbeføre høgt opp, så det vart ikkje heilt det pudderføre me hadde sett for oss. Snudde 2-300 høgdemeter før toppen pga dårlig sikt og ustabil snø vidare oppover. Bra nysnøføre ned til Olastøl, men tidenes sugeføre etter det.

Stokksel-Stokkseldalen-Ingebjørgfjellet

Ingebjørgfjellet (1210m). Vindpåvirka øvst, men langt betre enn forventa med jamnt fint skareføre nedatt frå Nonfjell.

Skaftedal-Horndalsnuten(1461m)

Skaftedal-Skykkjesete-Steinhytta-Horndalsnuten. Fullstendig vindstille på toppen. Nedatt "elvedalen" til Skykkjesete i perfekt føre. God varme frå sola, likevel ikkje antydning til slush i dag heller.